(Видео) „Немаат кредибилитет да бараат оставки“, премиерот го брани министерот за земјоделие од интерпелацијата на СДСМ

Премиерот Христијан Мицкоски оцени дека интерпелацијата поднесена од СДСМ за министерот за земјоделство Цветан Трипуновски е неоснована и безпредметна, посочувајќи дека аргументите на опозицијата не држат.

„Сметам дека интерпелацијата не е основана имајќи ги предвид наводите кои се таму изнесени. Имајќи ги предвид политиките на СДСМ кон земјоделците, неисплатените плати во Национални шуми, неисплатените субвенции, долгови, тие имаат најмалку право да зборуваат за оставка или интерпелација“, изјави Мицкоски.

— реклама —

Тој додаде дека интерпелацијата е легитимен демократски инструмент, но изрази уверување дека министерот Трипуновски ќе ги презентира своите аргументи и ќе одговори на обвинувањата.

— реклама —

„Во демократијата има и такви инструменти, уверен сум дека министерот ќе ги презентира своите аргументи, ама мојот став е дека апсолутно е безпредметна оваа интерпелација“, рече премиерот.

— реклама —

Претходно, СДСМ поднесе интерпелација за работата на министерот Трипуновски, обвинувајќи го за, како што наведуваат, „системска корупција, злоупотреба на службената положба и катастрофални политики“ кои, според нив, го довеле земјоделството до колапс.

— реклама —

Од партијата посочуваат дека се крателе субвенции, се укинале програми и биле суспендирани европски фондови, при што илјадници земјоделци останале без поддршка. Дополнително, наведуваат и случаи на корупција кај најблиските соработници на министерот, како и сериозни проблеми со функционирањето на институциите во ресорот.

Интерпелацијата е поднесена во Собранието и се очекува да биде предмет на расправа во наредниот период.