Заменик-директорот на ЈП „Национални шуми“, Кире Михаилов, преку објава на социјалните мрежи сподели непријатно искуство при гаснење на два пожара во струмичкиот регион, упатувајќи апел за поголема совест и солидарност кај граѓаните.
Тој информира дека при обиколка на терен случајно биле забележани два пожара – на влезот во селата Габрово и Банско. Благодарение на брзата интервенција на Територијалната противпожарна единица Струмица и екипите на „Национални шуми“, двата пожара биле брзо локализирани и изгаснати.
Михаилов раскажува дека додека со колега се обидувале да го задржат огнот, гаснејќи го со гранки и буквално со нозете, покрај нив поминале повеќе од 50 возила, а само едно младо момче застанало да праша дали е потребна помош.
Дополнително, посочува дека кога пристигнало противпожарното возило и цревото било поставено преку коловозот, дел од возачите негодувале поради чекањето, а двајца дури поминале со возилата преку противпожарното црево.
Според него, доколку пожарот навреме не бил запрен, за кратко време ќе се проширел кон тешко пристапен каменест терен, каде неговото гаснење би било речиси невозможно.
Михаилов изрази сомнеж дека двата пожара не се случајни, бидејќи избувнале на неколку километри еден од друг и со само неколку минути временска разлика.
Тој апелираше до граѓаните веднаш да пријавуваат сомнителни појави на бројот 112, но и да не остануваат рамнодушни кога ќе се најдат во близина на пожар.
„Тоа што го браниме не е ничие лично. Тоа е наша заедничка татковина и наследство за идните генерации“, порача Михаилов.
