Германската полиција покрена истрага против чешкиот мултимилионер Радим Пасер, кој возел 417 километри на час на германски автопат со своето „Бугати“, па се пофалил на Јутјуб, објавија локалните медиуми.
Иако на германските автопати нема ограничување на брзината, трките се забранети, како и таканаречената единечна трка.
Според германските закони и т.н. „Поединечна трка е забранета доколку возачот вози со неприлагодена брзина, грубо ги прекршува правилата за да постигне најголема можна брзина“, соопшти полицијата во Магдебург.
На видеото на Јутјуб, се гледа движењето на спортскиот автомобил „Бугати Широн“ на германскиот автопат А2 од Берлин до Хановер и достигнува брзина до 417 километри на час.
Радим Пасер се збогатил на пазарот на недвижности и според чешкото издание на магазинот Форбс е „тежок“ на околу 305 милиони долари.
