(Видео) Над 500 спасувачи ангажирани по разорните напади низ Украина

Украинскиот претседател Володимир Зеленски соопшти дека повеќе од 500 припадници на службите за итни интервенции биле ангажирани во справувањето со последиците од масовниот руски напад извршен во текот на ноќта врз повеќе украински градови.

Според Зеленски, најсилниот удар бил насочен кон Киев, каде што биле оштетени десетици станбени објекти и друга цивилна инфраструктура.

„Главниот удар беше врз Киев, каде што повторно се оштетени десетици станбени згради и други цивилни објекти. За жал, според досегашните информации, четири лица го загубија животот. Изразувам сочувство до нивните семејства и најблиски“, напиша Зеленски на социјалната мрежа Икс.

— реклама —

Тој додаде дека во болниците во украинската престолнина се хоспитализирани 38 лица кои добиваат неопходна медицинска помош.

Во Днипро, спасувачките екипи продолжуваат со потрагата по преживеани во урнатините на четирикатна станбена зграда која била тешко оштетена во нападот.

— реклама —

„Дел од зградата практично е урнат. Во нападот загинаа девет лица, меѓу кои и едно дете, а 35 се повредени“, соопшти Зеленски.

Тој наведе дека судбината на уште шест лица засега е непозната и дека спасувачките операции ќе продолжат сè додека има надеж за нивно пронаоѓање.

— реклама —

Според украинскиот претседател, руските сили погодиле и енергетски објекти во Харковската област, како и критична инфраструктура во самиот Харков. Напади биле регистрирани и во Киевската, Николаевската, Запорошката, Полтавската, Сумската, Черниговската и Хмелницката област.

Зеленски изјави дека Русија во текот на ноќта лансирала вкупно 656 беспилотни летала и 73 ракети од различни типови, меѓу кои балистички, крстосувачки и противбродски ракети.

„Ова е напад од огромни размери и јасна порака од Русија – доколку Украина не биде заштитена од балистички и други ракетни удари, овие напади ќе продолжат“, предупреди тој.

Украинскиот претседател повторно повика на дополнителна меѓународна поддршка, нагласувајќи дека на Европа ѝ е потребен посилен антибалистички штит, а испораката на ракети за системите „Патриот“ од САД останува од клучно значење за одбраната на земјата.

„Сметаме на поддршката од нашите партнери и на ефикасен одговор по денешниот напад“, порача Зеленски, заблагодарувајќи им се на граѓаните кои ги почитувале предупредувањата за воздушна опасност.