Претседателот на Комисијата за култура, Мирче Најдоски, на денешната прес-конференција обвини дека пратениците од ВМРО-ДПМНЕ гласале против предлог-законот на СДСМ за воспоставување државна награда што би го носела името на Блаже Конески.
На прес-конференција, Најдоски рече дека со одбивањето на предлогот, како што оцени, е отфрлена и можноста за воспоставување највисоко институционално признание за значајни научни и стручни достигнувања во областа на македонскиот јазик и македонистиката.
Тој го истакна значењето на Блаже Конески, наведувајќи дека бил главен кодификатор на македонскиот литературен јазик и основоположник на современата македонска наука за јазикот. Најдоски посочи и дека Конески бил лингвист, литературен и културен историчар, поет, прозаист и преведувач, како и прв претседател на МАНУ и ректор на Универзитетот во Скопје.
Според предлогот на СДСМ, државната награда требало да се доделува еднаш годишно за најзначајни научни и стручни достигнувања поврзани со македонскиот јазик и македонистиката. Наградата би го носела името на Блаже Конески и би се врачувала на 19 декември, денот на неговото раѓање.
„Зошто им смета Блаже Конески?“, праша Најдоски, додавајќи дека, според него, власта две години не го спроведува ниту Законот за употреба на македонскиот јазик.
Тој упати критики и за односот на власта кон културното наследство, при што го спомена и случајот со Македониумот.
Најдоски оцени дека гласањето против предлогот за државната награда претставува показател за односот на ВМРО-ДПМНЕ кон македонскиот јазик и македонистиката.
