Најмалку 13 лица загинаа, а 56 се повредени во силниот руски воздушен напад врз Киев и други украински градови, извршен во текот на ноќта. Според украинските власти, меѓу повредените има и деца, а 32 лица се хоспитализирани.
Руските сили извршиле комбиниран напад со десетици крстосувачки и балистички ракети, како и голем број беспилотни летала, при што биле погодени станбени згради, хотел во центарот на Киев и други цивилни објекти. До раните утрински часови биле регистрирани оштетувања на најмалку 28 локации, претежно на станбени објекти и цивилна инфраструктура.
Началникот на Киевската градска воена администрација, Тимур Ткаченко, изјави дека нападите повторно биле насочени кон станбени населби.
„Непријателот повторно ги гаѓа станбените квартови и убива цивили. Имаме сериозни разурнувања и голем број жртви, меѓу кои има и деца“, изјави Ткаченко.
Нападот започнал со масовно лансирање беспилотни летала од повеќе правци кон главниот град, по што во текот на ноќта следувале балистички ракети, вклучувајќи и хиперсонични ракети „Циркон“. Украинската противвоздушна одбрана дејствувала во повеќе делови од Киев, додека жителите ноќта ја поминале во засолништа и станици на метрото.
Во нападите бил оштетен и објект во кој се наоѓала станица за итна медицинска помош, при што биле повредени петмина медицински работници. Пожари избувнале на повеќе локации, а спасувачките екипи трагаат по лица затрупани под урнатините на урнати станбени згради.
Нападот уследи само неколку часа откако украинскиот претседател Володимир Зеленски предупреди дека Русија подготвува нов масовен воздушен удар. Тој изјави дека украинските разузнавачки служби располагале со информации за подготовка на напад од големи размери.
Во меѓувреме, украинските власти соопштија дека Русија во последниот период ја променила тактиката на воздушните напади, користејќи поголем број балистички ракети и насочувајќи ги нападите не само кон станбени населби и цивилна инфраструктура, туку и кон културни и историски објекти.
