Обилните врнежи од дожд во Непал предизвикаа серија свлечишта и надојдени поплави, при што во последните 36 часа загинаа најмалку 22 лица, а повеќе од десетмина се водат како исчезнати, соопштија тамошните власти.
Полицијата потврди дека 18 лица загинале во одделни свлечишта во источниот округ Илам, кој се граничи со Индија. Три лица загинале од удар на гром во јужниот дел на земјата, а едно лице загинало во поплави во округот Удајапур.
„Во тек се спасувачки акции за исчезнатите,“ изјави портпаролката на Националната агенција за управување со ризици од катастрофи, Шанти Махат, за агенцијата Ројтерс.
Свлечиштата и надојдените реки блокирале автопатишта и урнале мостови, поради што стотици патници останале заглавени на патиштата. Домашниот авионски сообраќај е нарушен, додека меѓународните летови во главниот град Катманду се одвиваат нормално, потврди портпаролот на аеродромот Ринџи Шерпа.
Во југоисточниот дел на земјата, реката Коши излегла од своето корито и достигнала опасно ниво, предупредија локалните власти. Протокот на вода бил повеќе од двапати над нормалата, а сите 56 отвори на браната Коши се отворени за да се намали нивото на водата.
Главниот град Катманду е делумно изолиран – неколку локални реки излеале и поплавиле улици и домови, а некои населби се целосно отсечени од остатокот на земјата.
Свлечишта и поплави се чест феномен во планинскиот Непал за време на монсунскиот период, кој трае од средината на јуни до септември. Секоја година, стотици луѓе ги губат животите во вакви несреќи.
Метеоролозите предупредуваат дека дождовите ќе продолжат најмалку до понеделник, а властите преземаат дополнителни мерки за евакуација и помош на населението погодено од катастрофата.
