(Видео) Најмалку 31 загинат во руски напад врз училиште во Украина, 48 лица се водат како исчезнати

Најмалку 31 лице загинало, а по 48 сè уште се трага по рускиот напад врз училишна зграда во селото Комишувака, во украинската Запорошка област. Според локалните власти, руските сили фрлиле најмалку девет бомби врз објектот, кој во тој момент служел како засолниште за цивили и центар за распределба на хуманитарна помош.

— реклама —

Гувернерот Михајло Семикин соопшти дека луѓето се засолниле во новоизграден подрум со армирана бетонска конструкција, чија изградба била финансирана од Европската Унија. Силата на експлозиите ја урнала конструкцијата и предизвикала пожар.

Украинскиот претседател Володимир Зеленски го оцени нападот како ужасен, посочувајќи дека се случил во понеделникот, токму за време на распределбата на хуманитарната помош.

— реклама —

Според украинските власти, нападот бил изведен во два брана. По првичниот удар, руските сили повторно ја нападнале локацијата кога пристигнале спасувачките екипи. Во вториот напад загинале најмалку двајца спасувачи, како и четворица полициски службеници кои им помагале на жителите да се засолнат.

— реклама —

Гувернерот Семикин изјави дека биле употребени воздушни бомби КАБ-500 и ФАБ-3000, меѓу кои и бомба тешка три тони со околу 1,5 тони експлозив.

Нападот е меѓу најсмртоносните врз цивилни цели во Украина од почетокот на војната. Зеленски повторно повика на меѓународна поддршка за зајакнување на украинската воздушна одбрана и спречување на нови руски напади.

— реклама —