(Видео) Најсилниот тајфун годинава ја погоди Кина: Евакуирани повеќе од 700.000 луѓе

Тајфунот „Ноул“, најсилната бура што ја погоди Кина оваа година, во неделата стигна до копното во близина на градот Хуејџоу, во јужната покраина Гуангдонг.

Поради силните ветрови и обилните врнежи, кинеските власти евакуираа повеќе од 700.000 луѓе, а Националниот метеоролошки центар издаде црвено предупредување – највисок степен на опасност во земјата.

— реклама —

Невремето предизвика сериозни нарушувања во сообраќајот. Во Гуангџоу, Шенжен и Хонг Конг се откажани повеќе од 1.000 летови, а во прекин се и над 190 меѓугранични линии на брзи возови.

Кинеската влада одвои 100 милиони јуани за справување со последиците и санација на погодените подрачја.

— реклама —

— реклама —

„Ноул“ е дванаесеттиот тропски циклон годинава, но и првиот тајфун што ја погоди покраината Гуангдонг во 2026 година. Според прогнозите, бурата ќе продолжи да се движи кон внатрешноста на земјата, носејќи силен ветер и обилни дождови во покраините Џијангси, Хунан и Хубеи.

Метеоролозите предупредуваат дека во следните 24 часа се очекуваат интензивни врнежи во Гуангдонг, јужен Фуџијан, делови од Џијангси, Хунан и југоисточен Тајван.

Само во покраината Гуангдонг досега се евакуирани 715.351 лице, а во 12 градови е воведена мерката „пет прекини“, со која привремено се суспендирани наставата, работата на компаниите и институциите, производството, јавниот превоз и деловните активности.