(Видео) Напад во срцето на руското летувалиште: Дрон експлодирал кај пристаништето во Сочи

Украински поморски беспилотни летала утрово ја нападнале руската црноморска туристичка дестинација Сочи, во Краснодарскиот крај, објави украинскиот воен портал „Милитарни“.

Аналитичарите на порталот заклучокот го донеле врз основа на геолокација на снимки и фотографии објавени од каналот за следење „Ексиленова+“. На снимките што ги објавиле локални жители на социјалните мрежи се гледа густ црн чад што се издига од подрачјето на експлозиите. На една од снимките се гледа и експлозија на поморски беспилотен апарат во непосредна близина на пристанишниот кеј.

— реклама —

Според фотографиите од теренот, една од експлозиите се случила во близина на позиција на која бил распореден рускиот систем за противвоздушна одбрана „Панцир“. „Милитарни“ наведува дека се претпоставува оти токму системот бил една од целите на нападот, но оваа информација не е независно потврдена.

За време на нападот, локални канали известувале за силни детонации во различни делови од градот и ги повикале жителите да се оддалечат од подрачјето околу морското пристаниште.

— реклама —

Истовремено, руската сојузна агенција за воздушен сообраќај вовела привремени ограничувања за полетувања и слетувања на аеродромите во Сочи и Геленџик, со образложение дека мерката е преземена за „обезбедување на безбедноста на летовите“.

Сочи е едно од најпознатите руски летувалишта на источниот брег на Црното Море и се наоѓа во подножјето на Кавказ. Градот беше домаќин на Зимските олимписки игри во 2014 година, а во негова близина се наоѓа и летната резиденција на рускиот претседател Владимир Путин.

— реклама —

Според достапните географски проценки, Сочи е оддалечен повеќе од 500 километри воздушна линија од најблиската територија под контрола на Киев, додека растојанието по морски пат низ Црното Море е значително поголемо. Доколку нападот бил изведен со поморски беспилотни летала, тоа би покажало можност за дејствување длабоко во руската заднина.

Ограничувањата на воздушниот сообраќај во Сочи и Геленџик отвораат можност во нападот да биле употребени и беспилотни летала од воздух, но засега нема потврдени информации или снимки што би го докажале тоа.

Украинските сили минатиот месец изведоа сличен комбиниран напад врз руска поморска база и пристаниште во Новоросијск, при што, според украински извори, биле употребени противбродски ракети „Нептун“, млазни беспилотни летала „Палјаница“ и поморски беспилотни апарати.