(Видео) „Не бараме сочувство, бараме одговорност“: Жените на протестот побараа имиња и санкции за институционалните пропусти

„Не бараме сочувство, бараме одговорност“, порача учесничка на протестот во Скопје по трагедијата во Богданци, во која животот го загуби 17-годишната Билјана Кириќ. Демонстрантите побараа конкретни санкции за институционалните пропусти, итни законски измени за заштита од насилство и разрешување на функционерите кои со своите јавни ставови го оправдуваат или нормализираат насилството врз жените.

„За сите пропусти бараме имиња, одговорност и санкции. Итно поднесување и усвојување на законските измени за заштита од насилство“, порача учесничката на протестот.

Таа предупреди дека борбата против родово базираното насилство не може да биде успешна доколку истовремено се поткопува неговото препознавање во општеството и институциите

— реклама —

„Не може да водиме борба против родово базирано насилство ако го поткопуваме неговото препознавање. Разрешете ги тие кои повикуваат на контрола на жените, го оправдуваат насилството или го нормализираат истото“, истакна таа.

Според демонстрантите, барањата за поголема заштита и одговорност не се нови, туку со години се повторуваат по секој нов случај на насилство врз жена.

— реклама —

„Ова не се нови барања, истите ги повторуваме со години. Истите предупредувања и докази. Списокот на убиени жени расте. Затоа нема да ви кажеме дека се надеваме дека ќе нè слушнете“, порача говорничката.

Протестниот марш е насочен покрај Собранието, Министерството за правда и Министерството за образование, со порака дека одговорноста за спречување на насилството не смее да остане само на декларативни заложби.

Особено силна реакција предизвика пораката со која учесничката се спротивстави на сведувањето на улогата на жените исклучиво на мајчинството и раѓањето.

— реклама —

„Ние не сме машини за раѓање, ние сме жени, работнички, мајки, ќерки, сестри и другарки. И тука сме заедно, не бараме сочувство, бараме одговорност“, порача таа.

Протестот следува по смртта на 17-годишната Билјана, за која претходно беше соопштено дека пријавувала насилство и дека постоела судска мерка за заштита.

— реклама —

Демонстрантите бараат да се утврди дали надлежните институции навремено постапувале по пријавите и дали можеле да преземат дополнителни мерки за да ја спречат трагедијата.

Нивната порака е дека секој нов случај не смее да завршува само со изразување сочувство и ветувања, туку со утврдување одговорност и конкретни промени во системот за заштита на жените.

View this post on Instagram