(Видео) „Во 2026 година сè уште се бориме да останеме живи - ова не се љубовни драми туку смртоносен систем“, порака од протестот по трагедијата во Богданци

„Истата полиција, истите институции, истите пропусти, истите барања и ветувања. Само името е друго“, порачаа учесниците на протестот што се одржува пред Собранието и во паркот „Жена борец“ во Скопје, по трагедијата во Богданци, во која животот го загуби 17-годишната Билјана Кириќ.

На протестот беше упатена жестока критика кон институциите, кои, според демонстрантите, и покрај пријавеното насилство и изречените мерки за заштита, не успеале да спречат уште една трагедија.

„Денес, во 2026 година, ние сè уште се бориме за најосновното право – да останеме живи. Пред една година стоевме тука и за убиството на Росица и можам да го земам истиот говор и да го прочитам. Истата полиција, истите институции, истите пропусти, истите барања и ветувања. Само името е друго“, беше порачано на протестот.

— реклама —

Говорниците потсетија на повеќе жени и девојчиња кои ги загубиле животите, нагласувајќи дека насилството врз жените не смее да се третира како изолиран инцидент.

„Во 2026 година убиени се седум жени. Пред неа беа Рамајана, Данче, Росица, Јамка, Марија и Ира. Беа Ивана и шестгодишната Катја, беше Ања“, порачаа демонстрантите.

Особено остри беа пораките за начинот на кој јавноста и институциите ги третираат случаите на насилство врз жените.

— реклама —

„Ова не се љубовни драми, моменти на лудило – ова е систем. Системот се вика патријархат и е смртоносен“, беше истакнато во говорот.

Учесниците на протестот посочија дека Билјана имала само 17 години, дека претходно пријавила насилство и дека постоела судска забрана, но тоа не било доволно за да се заштити нејзиниот живот.

— реклама —

„Зборуваме за 17-годишно девојче. Билјана имаше пријавено насилство, имаше судска забрана, но каква корист има тоа кога денес не е жива?“, прашаа демонстрантите.

Тие обвинија дека институциите повторно се повикуваат на процедури и документација, додека суштинската заштита на жртвите изостанува.

„Институциите се правдаат со протоколи и документи. Единственото нешто што недостигаше е вистинска и навремена заштита“, порачаа на протестот.

— реклама —

Трагедијата во Богданци повторно го отвори прашањето за ефикасноста на институционалната заштита на жртвите на насилство, особено во случаи кога веќе постојат пријави, предупредувања и судски мерки.

Пораката од протестот беше дека формалното постапување не е доволно доколку не обезбеди реална безбедност и не спречи нови жртви.

View this post on Instagram