(Видео) Недостиг на гориво во Русија: Возачи кампуваат пред бензински пумпи чекајќи ред

Последиците од војната во Украина сè повеќе се чувствуваат и во секојдневниот живот во Русија, каде што недостигот на гориво доведе до необична појава – возачи поставуваат шатори покрај бензинските пумпи за да не го изгубат местото во долгите редици.

Според украински медиуми, а и според видеоснимки што се шират на социјалните мрежи, граѓаните во некои руски региони со денови чекаат цистерни со гориво. На една снимка од Волгоград се гледаат долги колони автомобили, додека дел од возачите поставиле шатори и камп-маси покрај бензинска пумпа, очекувајќи да дојдат на ред за точење гориво.

— реклама —

Медиумските извештаи наведуваат дека состојбата е особено тешка на окупираниот Крим, каде што поради проблемите во снабдувањето значително пораснале цените, а недостигот на гориво се проширил и во јужните руски региони, како Краснодарскиот крај и Ростовската област. Во дел од местата, граѓаните почнале да создаваат резерви од основни производи.

— реклама —

Во обид да ја стабилизира состојбата, руската влада воведе целосна забрана за извоз на дизел, откако претходно веќе го ограничи извозот на бензин и керозин, пренесува Reuters. Целта е преостанатите количини да бидат насочени кон домашните потреби, особено за земјоделството и воените операции.

Поради недостигот, властите дозволиле и продажба на гориво со понизок еколошки стандард, додека дел од нафтените компании, меѓу кои и Tatneft, ја ограничиле продажбата на 20 до 30 литри по возило.

Според BBC, кризата е последица на повеќемесечните украински напади со беспилотни летала врз руската нафтена инфраструктура. Од почетокот на годинава биле погодени повеќе од 20 големи руски рафинерии.

— реклама —

Анализата на Reuters покажува дека нападите врз рафинериите и нафтените терминали во Кириши, Москва, Рјазањ и други градови привремено ставиле надвор од функција речиси една четвртина од рускиот капацитет за преработка на нафта, што дополнително го отежнува снабдувањето со гориво во земјата.

И покрај ваквата состојба, Кремљ и натаму тврди дека таканаречената „специјална воена операција“ се одвива според планираното.