Системите за автоматско препознавање на регистарски таблички (ALPR) повторно се во центарот на вниманието во САД, откако 77-годишен пензионер од Флорида избра необичен начин да протестира против нивната употреба.
Карл Ган секоја сабота оди на различна локација во градот Сент Питерсбург, каде што полицијата користи околу 50 вакви камери. Тој застанува под една од нив и со табла поставена на стап привремено ѝ го блокира видното поле.
Според него, сакал да испрати порака без да оштетува јавен имот.
„Видов дека некои ги уништуваат камерите, но тоа не е мојот начин. Сакав мирно да го изразам своето несогласување“, изјавил Ган за локалните медиуми.
За време на еден од протестите, полицијата разговарала со него, но му дозволила да продолжи. Според достапните информации, тој не бил ниту приведен, ниту казнет.
Неговиот протест доаѓа во период кога низ САД се води сè поголема дебата за употребата на системите што автоматски ги читаат регистарските таблички.
Иако компанијата „Flock Safety“ е меѓу најпознатите производители на вакви камери, слични технологии нудат и други компании, а во некои американски градови договорите со добавувачите веќе се раскинати поради загриженоста за заштитата на приватноста.
Ган нагласува дека неговиот протест не е насочен против конкретна компанија, туку против технологијата за масовен надзор воопшто.
