(Видео) Непријатна расправа во живо на српска телевизија: „Што правам јас овде?!“, аналитичарот ја збуни водителката, член на СНС сакаше да си замине

Промените во српските телевизиски програми стануваат сè повидливи, особено на медиумите кои досега беа наклонети кон претседателот Александар Вучиќ. Во нивните емисии повторно се појавуваат гости кои со години немаа простор да ги изнесат своите ставови, а кои беа противници на владејачката гарнитура.

Таква ситуација се случи во средата наутро во утринската програма на телевизијата „Прва“, каде што гостуваше српско-канадскиот режисер, продуцент и политички коментатор Борис Малагурски. Уште на почетокот на разговорот, тој ја праша водителката Анѓела Ѓурашковиќ зошто бил поканет на телевизија која, како што тврдеше, со години не му дозволувала да гостува.

— реклама —

„Зошто ме поканивте? Свесен сум дека бев забранет на речиси сите телевизии во Србија да зборувам за која било тема, па ме интересира што се промени сега?“, праша Малагурски.

Водителката одговори дека поканувањето гости е работа на уредништвото и дека таа професионално ја извршува својата работа. Малагурски, сепак, продолжи со прашањата, наведувајќи дека телевизиите со години известувале еднострано и дека постоеле списоци на подобни и неподобни гости.

— реклама —

Тој побара од водителката да објасни како функционирал таквиот систем, но таа рече дека не може да зборува во име на раководството на телевизијата.

Во расправата се вклучи и другиот гостин во студиото, Владимир Маринковиќ, потпретседател на Народното собрание на Србија од редовите на Српската напредна партија. Незадоволен од текот на разговорот, тој најави дека ќе го напушти студиото, поради што водителката неколкупати го замоли да остане.

Малагурски појасни дека немал намера никому да му создава непријатност, туку сакал да се отворат прашања за кои, според него, не се разговарало во изминатите години. Маринковиќ ја оцени ситуацијата како несериозна, а водителката се обиде да ја врати емисијата на првично планираните теми.

— реклама —

Програмата требало да биде посветена на преглед на дневниот печат и на политичките случувања во САД, но Малагурски сметаше дека во актуелниот момент треба да се разговара за состојбите во Србија.

На прашањето дали однапред ја знаел темата на емисијата, тој одговори дека никој не му ја соопштил. Водителката оцени дека тоа е пропуст и на уредништвото и на самиот гостин, бидејќи прифатил покана без да знае за што ќе се разговара.

Малагурски, сепак, остана на ставот дека главната тема треба да биде она што се случува во Србија, а не во САД. Водителката ја бранеше работата на телевизијата, тврдејќи дека известувала објективно, додека Малагурски остро го критикуваше начинот на кој биле обработувани вестите.