(Видео) Невреме на југот на Франција: Поплавени куќи, затворени патишта и спасувачки акции

Обилните врнежи предизвикаа поплави и сериозни проблеми на југот на Франција, каде што четири области се под портокалово метеоролошко предупредување. На Корзика во текот на ноќта биле евакуирани 73 лица, соопштија надлежните служби.

Француската метеоролошка служба „Метео Франс“ го проширила предупредувањето и на областите Источен Еро и Јужен Гар, покрај Корзика и Горна Корзика. Предупредувањето стапило во сила во 10 часот, а постои можност да биде подигнато на повисоко ниво доколку продолжат силните бури.

— реклама —

Евакуираните жители на Корзика биле сместени во спортска сала во Порто Векио. Од средата, обилните дождови го зафатиле ова подрачје, при што биле спасени 20 лица. Едно од нив било извлечено од автомобил што го однела надојдена вода.

— реклама —

Поплавени се и десет куќи, а неколку патишта се затворени поради излевање на водата преку мостовите во околината на Порто Векио, Сота и Фигари.

— реклама —

Во областите Источен Еро и Јужен Гар се очекуваат силни врнежи во текот на денот, кои би можеле да надминат 120 милиметри. Метеоролозите предупредуваат дека земјиштето веќе е заситено со вода поради обилните врнежи во изминатите недели. Силни грмежи и пороен дожд вчера го погодија и Монпелје.

— реклама —

Портокаловото предупредување за Корзика треба да остане во сила до петок напладне, додека во областите Гар и Еро се очекува да биде укинато на полноќ во четврток.