(Видео) Невреме пустоши делови од Германија: Загина едно лице, прогласена оперативна вонредна состојба

Едно лице загина, а неколкумина се повредени во силното невреме што зафати големи делови од германската сојузна покраина Баден-Виртемберг, поради што властите прогласија оперативна вонредна состојба.

Според полицијата, во градот Карлсруе, едно лице го загубило животот откако дрво, соборено од силната бура проследена со грмежи, паднало врз него. Полесни повреди од паднати гранки добиле и неколку возачи, како и едно дете.

— реклама —

Поради големиот број инциденти, градските власти прогласиле оперативна вонредна состојба, за сите интервенции да се координираат од еден центар.

Противпожарната служба соопшти дека во текот на четвртокот вечерта и ноќта примила повеќе од 250 повици за интервенција.

— реклама —

И во другите делови на покраината службите за итни случаи биле целосно ангажирани. Во Пфорцхајм, полицијата примила околу 30 повици, а биле извршени околу 70 интервенции, главно поради паднати покривни ќерамиди и поплавени подруми.

— реклама —

Во Безигхајм гром удрил во покрив на објект и предизвикал пожар, при што неколку лица се здобиле со полесни повреди.

Во округот Ремс-Мур, силниот ветер соборувал дрвја врз згради, а првичната проценка на материјалната штета изнесува околу 100.000 евра. Полицијата соопшти дека на тоа подрачје примила околу 50 повици за интервенција.

Надлежните продолжуваат да ја следат состојбата и ги повикуваат граѓаните на претпазливост поради можноста од нови временски непогоди.