(Видео) Ноќни напади врз Саратов и Волгоград: Погодени складиште на „Озон“ и хемиска фабрика

Украинските сили во текот на ноќта извршиле напади врз објекти во руските градови Саратов и Волгоград, при што, според украинскиот производител на оружје „Фајр Поинт“, бил погоден голем складишен комплекс на интернет-трговецот „Озон“ и хемиска фабрика во Волгоград.

Од „Фајр Поинт“ објавија дека складишниот комплекс на „Озон“ во Саратов бил погоден со беспилотни летала FP-1. Според нивните наводи, станувало збор за објект со површина од околу 85.000 квадратни метри, наменет за складирање на повеќе од 30 милиони производи.

— реклама —

„Озон“ е еден од најголемите руски интернет-трговци, со широка мрежа на складишта, центри за обработка на нарачки и достава низ земјата.

„Фајр Поинт“ истовремено објави дека неговите крстосувачки ракети FP-5 „Фламинго“ ја погодиле и фабриката „Волгоградпромпроект“ во Волгоград. Од компанијата тврдат дека биле забележани директни погодоци и дека избувнал пожар.

— реклама —

Снимките објавени на социјалните мрежи од канали кои ја следат војната покажуваат пожари во близина на објектот, но засега нема потврдени податоци за обемот на причинетата материјална штета.

— реклама —

Гувернерот на Волгоградската област, Андреј Бочаров, потврди дека регионот бил цел на напад. Тој соопшти дека биле регистрирани остатоци од погодени средства во подрачјето на индустриски објект во јужниот дел на Волгоград.

„Итните служби работат на терен и ги отстрануваат последиците“, изјави Бочаров, додавајќи дека надлежните служби и градската управа добиле задача да ја проценат штетата, да ги отстранат последиците и да ги подготват објектите за привремено сместување доколку биде потребно.

„Волгоградпромпроект“ се наоѓа под американски санкции поради соработка со рускиот воено-индустриски комплекс. Компанијата произведува катализатори за согорување што содржат фероцен и развива технологии за производство на хемиски производи.