(Видео) Нов голем пожар во Франција: Огнот зафати 1.600 хектари, евакуирани 650 лица

Нов шумски пожар брзо се шири во близина на Луглон, во францускиот регион Ланд, само неколку недели откако големи пожари опустошија илјадници хектари шума во југозападниот дел на Франција.

Пожарот избувнал во четвртокот, а досега зафатил околу 1.600 хектари шума и ниска вегетација, соопштија локалните власти. Поради брзото ширење на огнот, околу 650 лица биле евакуирани од претпазливост.

— реклама —

Луглон се наоѓа на околу 100 километри јужно од Бордо, во средината на голем шумски појас со крајбрежни борови. Засега нема информации дека пламенот зафатил куќи.

— реклама —

Во гаснењето се ангажирани околу 550 пожарникари, со поддршка од противпожарни авиони и тежок транспортен хеликоптер „Чинук CH-47D“, кој Австралија го ставила на располагање.

— реклама —

Хеликоптерот со два ротора може да носи до 11.300 литри вода, речиси двојно повеќе од противпожарен авион.

Пожарот во Луглон е најнов во низата големи шумски пожари што ја погодија Франција во последните недели. Кон крајот на јули, околу 3.700 хектари шума изгореа во близина на Бискарос, додека околу 42.000 хектари беа зафатени од пожар во близина на Сомос, во соседниот регион Жиронд.

Поради топлотниот бран и сушата, големи пожари избувнаа и во други делови на Франција, особено долж атлантскиот брег, при што десетици илјади жители и туристи мораа да бидат евакуирани.