Нов пожар избувна денеска напладне во областа Аспропиргос, во близина на Атина, јавуваат грчките медиуми.
Според „Катимерини“, на терен се ангажирани 38 пожарникари со 14 противпожарни возила, кои се обидуваат да го локализираат огнот. Пожарот избувнал во близина на местото каде што претходно денеска гореше голем комерцијален објект.
Во претходниот голем пожар, кој избувнал во фабрика за резервни делови во Аспропиргос, повредени се 11 лица, од кои тројца се во тешка состојба и се интубирани, пренесува „Прототема“.
Шестмина повредени биле пренесени во болницата „Триасио“. Двајца од нив се во критична состојба, тројца имаат полесни повреди, а едно лице веќе е пуштено на домашно лекување.
Останатите пет лица биле згрижени во болница во Атика. Едно од нив е во тешка состојба и се очекува да биде префрлено на Одделот за изгореници, додека четворица пристигнале со респираторни проблеми, предизвикани од чадот.
Според првичните информации, пожарот избувнал под засега неразјаснети околности во фабрика за резервни делови. Во неговото гаснење учествуваат 75 пожарникари, 20 противпожарни возила и хеликоптери.
Грчките власти ги предупредија жителите да не се приближуваат до погоденото подрачје поради присуство на токсични материи во воздухот.
Пожарната служба соопшти дека во кругот на компанијата се наоѓа цистерна со пропан, што дополнително ја усложнува интервенцијата и го зголемува ризикот.
На местото е испратен и тим за истрага, кој треба да ги утврди причините за избувнувањето на пожарот.
