(Видео) Нови детали: Камионџија од Струмица загина во страшната несреќа кај Славонски Брод

Во тешката сообраќајна несреќа што се случи кај Славонски Брод во Хрватска загинал камионџија од Струмица, кој управувал товарно возило со македонски регистарски таблички и работел за транспортна фирма од Куманово, пренесуваат повеќе медиуми.

Според првичните информации, камионот излетал од коловозот, ја пробил централната заштитна ограда, удрил во столб за улично осветлување и потоа преминал на спротивната лента, по што избувнал пожар. Возилото целосно изгорело, а возачот останал заглавен сам во кабината.

Од Полициската управа Брод-Посавина соопштиле дека камионот, движејќи се по јужната лента на автопатот А3, изгубил контрола и по излетувањето повеќепати удирал во заштитната ограда и инфраструктурни столбови, по што избувнал пожар кој брзо го зафатил целото возило.

Очевидци за хрватските медиуми изјавиле дека пламенот се проширил многу брзо и дека не можеле да пристапат до кабината за да му помогнат на возачот.

Причините за несреќата засега не се утврдени, особено затоа што не станува збор за судир со друго возило, туку за губење контрола над камионот. Според дел од претпоставките, можно е возачот да доживеал здравствен проблем пред несреќата, но истрагата сè уште трае.

Несреќата се случила на 5 мај околу 14:15 часот кај местото Среданци, во правец кон Брегана, на подрачјето на општината Доњи Андријевци.

На местото интервенирале противпожарни екипи, а поради оштетувања на електричната инфраструктура биле повикани и служби на ХЕП. Сообраќајот на овој дел од автопатот со часови бил во прекин или се одвивал под посебен режим додека траеле увидот и санацијата на последиците.

View this post on Instagram

— реклама —

— реклама —