Македонски државјанин загина во Италија по директен судир со камион

Седумдесет и осумгодишен македонски државјанин трагично го загубил животот во тешка сообраќајна несреќа во Италија, откако автомобилот со кој управувал директно се судрил со камион натоварен со чакал. Станува збор за Исмаил Асаноски, кој живеел во градот Конељано.

Несреќата се случила на 29 октомври, околу 15:40 часот, на улицата Страдонели во Сусегана, во италијанската провинција Тревизо, во близина на центар за собирање отпад.

— реклама —

Асаноски управувал со автомобил „шкода кодијак“ и се движел кон Санта Лучија ди Пјаве. Според првичните информации, постои можност на возачот ненадејно да му се слошило, по што изгубил контрола над возилото, преминал на спротивната коловозна лента и удрил во камионот. Оваа верзија засега не е официјално потврдена.

— реклама —

Од силниот удар предниот дел на автомобилот бил целосно уништен, а Асаноски останал заробен во возилото. Возачот на камионот, 61-годишен маж кој поминал без повреди, веднаш повикал помош и се обидел да му помогне.

На местото пристигнале противпожарни екипи, брза помош и медицински хеликоптер. Спасувачите го извлекле Асаноски од автомобилот, но обидите за реанимација биле неуспешни и лекарите ја констатирале неговата смрт.

— реклама —

Зад себе оставил сопруга и три деца, кои се занимаваат со градежништво и се сопственици на компанијата „Биг Коструциони“ во Понте дела Приула. Неговата смрт предизвикала голема тага меѓу семејството и локалната заедница.

— реклама —

Од него се простил и имамот на Исламскиот културен центар „Еманет“ во Сусегана, кој Асаноски редовно го посетувал. Тој го опишал како добар и великодушен човек, секогаш подготвен да им помогне на другите. Заедно со своите синови, Асаноски им помагал на луѓето кои се наоѓале во тешки животни ситуации.

Италијанската полиција продолжува да ги утврдува околностите под кои се случила несреќата.