Украински беспилотни летала рано утринава ја оштетиле руската балтичка пристанишна инфраструктура во Уст-Луга, потврди гувернерот на Ленинградската област, Александар Дрозденко. Станува збор за едно од најзначајните руски пристаништа на Балтичкото Море, каде што се наоѓа и важен нафтен терминал за извоз на сурова нафта и нафтени деривати.
Според руските власти, во текот на ноќта меѓу 31 август и 1 септември биле соборени десетици украински дронови над Ленинградската област. Во близина на Уст-Луга биле пресретнати 17 беспилотни летала, додека гувернерот Дрозденко соопшти дека до 6 часот наутро биле уништени вкупно 38 дронови.
Тој потврди дека во пристаништето е причинета материјална штета. На социјалните мрежи се појавија и снимки на кои наводно се гледа пожар во областа на пристаништето, но засега нема независна потврда за размерот на штетата.
Уст-Луга и претходно беше мета на украински напади, во услови на засилена кампања насочена кон руската нафтена инфраструктура. Во текот на март и април украинските сили изведоа повеќе напади со долг дострел врз објекти во оваа област, додека последниот пријавен напад беше на 14 август, кога, според украинскиот Генералштаб, биле оштетени две постројки и избувнал пожар.
Украина во изминатиот период ги засилува нападите врз руските рафинерии, складишта и други објекти поврзани со производството и извозот на гориво. Целта е да се наруши руското снабдување со енергенси и да се зголеми притисокот врз економијата.
Нападите веќе влијаат врз состојбата со горивото во Русија, каде што се воведени ограничувања на извозот, а во делови од земјата има и ограничувања во продажбата.
