Во јавноста се појави снимка од полициска камера која го прикажува моментот на апсењето на Бритни Спирс поради возење под дејство на алкохол во март годинава.
Според извештајот на CBS News, калифорниската сообраќајна полиција ја запрела пејачката откако била забележана како се движи нестабилно меѓу сообраќајните ленти на автопатот U.S. 101. Таа реагирала на полициските сигнали дури по околу 15 секунди.
Полицајците навеле дека почувствувале силен мирис на алкохол кога го спуштила прозорецот, а Спирс околу десет минути се расправала со нив пред да излезе од автомобилот. Во еден момент им понудила и храна.
„Ќе ви зготвам нешто, лазањи, што и да сакате. Имам базен“, им рекла таа на полицајците, уверувајќи ги дека е способна да вози.
Додека ѝ ставале лисици, пејачката ги прашала: „Чекајте, ми го земавте телефонот?“, на што полицаецот ѝ одговорил дека телефонот сè уште ѝ е во чантата.
Во извештајот се наведува дека Спирс делувала нестабилно, зборувала брзо и неразбирливо, а во одредени моменти користела британски акцент. Таа признала дека испила една мимоза неколку часа претходно и изјавила: „Веројатно можам да испијам четири шишиња вино и пак да внимавам на вас. Јас сум ангел.“
При претресот на возилото, полицијата пронашла и шише со лекот „Адерал“, кој не бил препишан на нејзино име, како и чаша за вино на предното седиште.
Двата алкотеста покажале ниво на алкохол под законската граница во Калифорнија, но бил земен и примерок од крв за тестирање на дрога. Спирс следното утро била пуштена на слобода.
Пејачката подоцна признала вина за несовесно возење и добила условна казна од 12 месеци, со што избегнала затворска казна.
