Македонската музика се слуша и во Холивуд. Една од најпознатите македонски народни песни, „На Струга дуќан да имам“, е дел од новиот американски филм „The Rivals of Amziah King“, во кој главните улоги ги имаат холивудските актери Метју Меконахи и Курт Расел.
Филмот е американски неовестерн трилер во режија на Ендру Патерсон, а од 14 август се прикажува во кината во САД.
Сцената во која може да се слушне македонската песна ја објави „Комикс.мк“, споделувајќи ја на Инстаграм.
Специфичната верзија на песната која е искористена во филмот е аранжирана од Етел Рејм, а ја изведува Женскиот вокален ансамбл „Китка“, со седиште во Оукленд, Калифорнија. Ансамблот за себе вели дека е фокусиран на источноевропските женски вокални традиции. Во изведбата учествуваат и Шира Камен и Питер Маунд.
Иако филмот во голема мера се потпира на американската блуграс и рутс музика, режисерот Патерсон се одлучил за традиционалната македонска песна поради нејзините впечатливи и цврсти вокални хармонии, како и карактеристичниот неправилен 7/8 ритам. Токму ритамот ѝ дава препознатлив танцувачки и мелодичен дух, а во филмот придонесува за посебна и возбудлива атмосфера.
Песната е една од познатите македонски градски лирски песни, а нејзината најпозната варијанта е посветена на Струга. Сепак, постојат и регионални верзии во кои се споменуваат други македонски градови и чаршии, меѓу кои и Велес и маалото Којник.
Нејзината препознатливост одамна ги надминала границите на Македонија. „На Струга дуќан да имам“ е присутна и на меѓународната фолклорна сцена, а сега македонската мелодија добива и ново место – во американска холивудска продукција со големи актер.ч
