(Видео) „Одвратен си, изгледаш ужасно“: Трамп со жестоки навреди кон новинар откако му поставил непријатно прашање

За време на средбата со претставниците на медиумите во воената база Ендрус во Мериленд, Доналд Трамп остро го нападна новинарот на агенцијата Ројтерс, Џејкоб Богаж, откако тој го праша дали го откажал предизборниот митинг во Канзас поради замор.

Инцидентот се случи откако Трамп ги откажа настапите на два предизборни митинзи во пресрет на изборите за американскиот Конгрес.

„Погледнете го овој тип. Воопшто не е во форма. Одвратен си. Доведи се во форма, изгледаш ужасно“, му рекол Трамп на новинарот.

— реклама —

Американскиот претседател потоа додал дека му е „лошо“ поради прашањето што му го поставил новинарот.

Навредите на Трамп следувале по прашањето за причините поради кои ги откажал предизборните митинзи, а снимката од инцидентот набрзо го привлече вниманието на јавноста.

— реклама —

Социјалните мрежи беа преплавени со коментари и пораки за поддршка на новинарот.

Корисниците споделуваа фотографии од Богаж и му упатуваа пораки на поддршка.

„Изгледа многу подобро од повеќето републикански гласачи“, напишал еден корисник.

— реклама —

„Можеби еден постар човек во костум што не му стои добро не би требало да го критикува туѓиот изглед“, навел друг.

Некои коментари биле уште поостри кон американскиот претседател.

„Одвратно е како тој кловн користи подмолни методи за да ги понижува другите. Ги навредува луѓето поради нивниот изглед. Нека некој му даде огледало“, напишал еден корисник на социјалните мрежи.

„Прилично иронично е кога токму тој го кажува тоа. Ниту Трамп не е олицетворение на физичката подготвеност“, гласел уште еден коментар.

Џејкоб Богаж е новинар на агенцијата Ројтерс, на која ѝ се приклучил во 2026 година. Во својата работа ги следи активностите на Белата куќа и американската економска политика.

Неговото прашање за причините за откажувањето на предизборните митинзи предизвикало остра реакција од претседателот, а снимката од нивната средба повторно ја отвори дебатата за односот на Трамп кон новинарите и начинот на кој реагира на непријатни прашања.