(Видео) Повеќе од 220 загинати во американските напади, ОН предупредуваат на можни злосторства против човештвото

Неодамнешните американски воздушни напади врз бродови осомничени за шверц на дрога можеби го прекршиле меѓународното право и би можеле да претставуваат злосторства против човештвото, се наведува во извештај на Обединетите нации.

Во извештајот на специјалниот известувач на ОН, Бен Саул, се наведува дека од септември минатата година во Карипското Море и Тихиот Океан, надвор од американските територијални води, биле извршени најмалку 68 американски напади, во кои загинале повеќе од 220 луѓе.

— реклама —

Извештајот е објавен два дена откако американската војска соопшти дека во напад врз брод во Карипското Море убила четири лица. Јужната команда на американските вооружени сили наведе дека разузнавачките податоци покажале оти пловниот објект бил активно вклучен во трговија со дрога, а загинатите ги опиша како „нарко-терористи“.

САД ја започнаа операцијата „Southern Spear“ во септември минатата година. Сепак, американските власти досега не презентирале цврсти докази дека целените пловни објекти навистина биле вклучени во шверц на дрога.

— реклама —

Американскиот секретар за одбрана Пит Хегсет претходно изјави дека целта на операцијата е отстранување на „нарко-терористите од нашата хемисфера“ и заштита на САД од дрогата за која тврди дека ги убива Американците.

— реклама —

Според Саул, дури и доколку лицата на пловните објекти се припадници на одредени терористички групи, тие не извршиле вооружен напад врз САД што, според меѓународното право, би го активирал правото на самоодбрана.

Во извештајот објавен од Советот на ОН за човекови права, Саул наведува дека нападите претставуваат серија вонсудски убиства и дека со нив се прекршува правото на живот, бидејќи, според неговата проценка, не се оправдани ниту со национална ниту со лична самоодбрана.

— реклама —

Тој додава дека за нападите, според неговото толкување, нема оправдување ниту во меѓународното хуманитарно право, правото на море, конвенциите за сузбивање на трговијата со наркотични средства или меѓународното право поврзано со тероризмот.

Саул заклучува дека постојат основи за сомневање оти 68-те пријавени напади, во кои загинале 223 лица, би можеле да претставуваат злосторства против човештвото во форма на убиства според обичајното меѓународно право.