Кичево е во шок по грозоморен настан што се случи вчера утрото, кога во непосредна близина на едно основно училиште биле пронајдени отруени десетина улични кучиња.
Очевидци раскажуваат дека сцената била морничава – мртви кучиња имало на патот и во дворот на училиштето. „Невиден хорор, умрени кучиња насекаде. Паѓаа пред нас, со бела пена на устата. Среќа што децата не беа на училиште. Некој намерно одбрал неработен ден, за да нема гужва. Ова е страшно и не смее да се повтори,“ изјави еден од жителите кој прв ја забележал случката.
Граѓаните се згрозени и бараат итна реакција од надлежните институции. Велат дека иако со години се соочуваат со опасности од уличните кучиња, ваков чин на насилство е неоправдан и нечовечен.
Вработените од Комуналното претпријатие биле повикани попладнето, околу 17 часот, за да ги отстранат телата на животните, откако на социјалните мрежи се појавиле снимки од местото на настанот. Бидејќи денот бил неработен, претпријатието не работело во утринските часови.
Проблемот со уличните кучиња во Кичево е долгогодишен и растечки. Минатата година Комуналната редарска служба изброила околу 500 кучиња скитници на територијата на Општината.
Општина Кичево годишно издвојува околу 20.000 евра од буџетот за третман и контрола на бројот на бездомни животни – преку стерилизација, вакцинација и нивно враќање на местото од каде што биле заловени.
Според граѓаните, единствено трајно решение за проблемот со уличните кучиња е изградба на стационар за нивно згрижување. Тие апелираат сторителот на овој грозоморен чин што поскоро да биде откриен и казнет, а надлежните институции да преземат мерки ваква трагедија никогаш повеќе да не се повтори.
