44-годишна параглајдеристка од Австрија преживеа драматична несреќа откако мал авион директно удри во нејзиниот параглајдер додека летала над Алпите во Австрија.
Инцидентот се случил во сабота во областа Пизендорф во Салцбург. Според полицијата, 28-годишен пилот кој вршел туристички лет налетал на жената, а подоцна изјавил дека немал можност да го избегне судирот.
„Елисата на моторниот авион сериозно го оштети параглајдерот, по што искусната параглајдеристка го активираше резервниот падобран“, соопшти полицијата во Салцбург.
Жената, која на социјалните мрежи се претставува како Сабрина, објави видео од несреќата на Инстаграм. На снимката се гледа мирен лет над Алпите, по што ненадејно во кадарот влегува бел авион и го кине параглајдерот само неколку метри над нејзината глава.
По ударот, таа почнала неконтролирано да се врти и да губи висина, но успеала смирено да го активира резервниот падобран, кој се отворил без проблеми и го ублажил падот.
Остатоците од скинатиот параглајдер останале закачени за нејзината опрема додека брзо се спуштала кон земјата. Сабрина успеала да ги ослободи нозете од опремата и безбедно да слета, по што била евакуирана со полициски хеликоптер.
„Навистина сè уште не можам да поверувам дека седам тука и го пишувам ова“, напиша таа, додавајќи дека поминала само со неколку модринки.
