(Видео) Пекинг отвори воена база во Лаос, на локација што некогаш ја користела американската ЦИА

Кина официјално отвори нова воена база во северозападниот дел на Лаос, на локација што за време на Виетнамската војна ја користела компанијата „Ер Америка“, управувана од американската Централна разузнавачка агенција (ЦИА).

Според Си-ен-ен, комплексот се наоѓа на околу 64 километри северно од главниот град Виентијан и на приближно 40 километри од најблиската граница со Тајланд. Во него се сместени Заедничкиот центар за поддршка и обука на Кина и Лаос на аеродромот Бан Кеун, како и Воздухопловната академија на кинеско-лаоското пријателство.

— реклама —

Кинеското Министерство за одбрана соопшти дека базата официјално започнала со работа на 29 септември. Сателитските снимки покажуваат дека уште во декември минатата година биле завршени работите на полетно-слетната патека, патеката за движење на авионите и платформата долга 2.000 метри, наменета за сместување до 22 авиони.

Од Пекинг наведуваат дека објектите ќе му помогнат на Лаос во обуката и развојот на пилотите на военото воздухопловство и дека со нив заеднички ќе управуваат двете земји. Според сателитските снимки, во базата се забележани осум авиони за кои се претпоставува дека можеби се лесни борбени авиони „Хонгду ЈЛ-8“, што се користат и за обука.

— реклама —

Кинеското Министерство за одбрана нагласи дека базата не е насочена против трета страна, туку треба да ја зајакне воената соработка меѓу двете земји и да придонесе за регионалниот мир и стабилност.

— реклама —

Досега Кина официјално имаше една воена база во странство, во Џибути, отворена во 2017 година. Пекинг, исто така, финансираше проширување на поморската база Реам во Камбоџа, што предизвика загриженост во врска со неговите регионални амбиции.

Сепак, аналитичарите оценуваат дека отворањето на базата во Лаос не значи значителна промена во рамнотежата на силите меѓу Кина и САД. Дру Томпсон од Школата за меѓународни студии „С. Раџаратнам“ во Сингапур изјави за Си-ен-ен дека е тешко да се замисли сценарио во кое базата би претставувала сериозна закана за американските сили во регионот.

Рејчел Ванденбринк од Австралискиот институт за стратешка политика оцени дека изборот на Бан Кеун веројатно е резултат на поволната можност, а не на конкретни оперативни потреби. Таа посочи дека Лаос има геостратешка вредност поради границата со Кина и инфраструктурните врски, вклучувајќи ја и железницата.