Песната „Цело Врање“, препев на познатата песна „Цело Скопје“ на Благица Павловска, повеќепати одекна во Врање при пречекот на студентите кои низ Србија патуваат со велосипеди во рамките на турата „Чувари на Уставот“.
Студентите, кои повеќе од една година организираат протести и бараат одговорност за уривањето на настрешницата на железничката станица во Нови Сад, на 17 септември започнаа десетдневна велосипедска тура низ Србија, како дел од предизборните активности на Студентската листа.
Во Врање ги пречекаа голем број граѓани со музика и факели, а меѓу песните што се пуштаа повеќепати беше и „Цело Врање“. Во исто време, во близина се собраа и приврзаници на владејачката Српска напредна странка, при што двете групи беа разделени со полициски кордон.
Песната денес е една од препознатливите неофицијални химни на Врање и често се изведува на свадби и други прослави во јужниот дел на Србија. Нејзината приказна започнала во 1995 година, кога Благица Павловска гостувала во емисијата „Турбо викенд“, заедничка програма на Радио Врање и Радио Гњилане.
Како гест кон домаќините и градот, Павловска тогаш донела српски препев на својата песна „Цело Скопје“, при што за таа пригода песната била преименувана во „Цело Врање“.
Она што започнало како гест кон домаќините брзо прераснало во локален хит. Во текот на петчасовната емисија, по барање на слушателите, песната била пуштана речиси секој час, додека телефоните во радиото непрекинато ѕвонеле.
Иако тогаш била емитувана само демоверзија, локалните музичари ја снимале од радиото на аудиокасети, ги ваделе акордите и набргу почнале да ја изведуваат на свадби и веселби.
Поради големата популарност, Павловска во 1998 година ја снимила и официјално ја објавила „Цело Врање“ на албум.
Студентските протести во Србија започнаа по уривањето на бетонската настрешница на железничката станица во Нови Сад на 1 ноември 2024 година, при што загинаа 16 лица. Студентите бараа објавување на целокупната документација поврзана со реконструкцијата на станицата и утврдување на одговорноста за трагедијата.
Со текот на времето, протестите прераснаа во пошироко антикорупциско движење, а едно од барањата подоцна стана и распишување вонредни парламентарни избори.
Студентската листа „Студентите победуваат“ е прогласена за учесник на изборите на 25 октомври, откако до Републичката изборна комисија биле доставени 69.099 правно валидни потписи за поддршка. Прв на листата е професорот на Медицинскиот факултет во Нови Сад, Илија Срдановиќ.
На изборите учествува и листата „Александар Вучиќ — Обединета Србија“, предводена од Вучиќ, како и коалицијата на прозападни опозициски партии позната како „Европска Србија“.
