Со порастот на температурите и почетокот на летната сезона, повторно се создадоа долги колони на Граничниот премин Богородица кон Грција.
Од утрово, граѓани и туристи јавуваат за значително зголемен сообраќај и подолго чекање за излез од државата. На социјалните мрежи се споделуваат фотографии и видеа на кои се гледа дека речиси целиот меѓуграничен простор е исполнет со возила кои чекаат да ја преминат границата.
Станува збор за појава која традиционално се повторува секое лето, особено за време на викендите и во периодите кога голем број граѓани заминуваат на одмор во Грција.
Надлежните редовно апелираат патниците да се информираат за состојбата на граничните премини пред да тргнат на пат и да ги планираат патувањата согласно очекуваниот интензитет на сообраќајот.
Се очекува зголемената фреквенција на возила на ГП Богородица да продолжи и во наредниот период, со оглед на тоа што туристичката сезона допрва влегува во својот најинтензивен дел.
