Мобилен царински тим спречи обид за криумчарење на 312 парчиња пури во вредност од околу 4.000 евра, при контрола на автобус на влез во државата на граничниот премин Табановце.
Како што информираат од Царинската управа, против К. Б., македонски државјанин и возач на автобус вработен во компанија за меѓународен патен превоз, е поднесена кривична пријава до Основното јавно обвинителство Куманово поради сомнение за сторено кривично дело „криумчарење“.
При деталната контрола, мобилниот царински тим пронашол вкупно 312 пури од различни производители, скриени под седиштата и во фабричка шуплина на автобусот. Проценетите избегнати давачки изнесуваат 174.900 денари.
Запленетите акцизни производи, по наредба на ОЈО Куманово, ќе бидат предадени на Агенцијата за управување со одземен имот.
Од Царинската управа најавуваат дека ќе продолжат со засилените контроли со цел спречување на нелегалната трговија со акцизни производи, заштита на финансиските интереси на државата и обезбедување услови за фер економија.
