Неочекуван инцидент ја одбележа ЛГБТ парадата во Солун, Грција каде православен свештеник легна на коловозот во обид да го спречи продолжувањето на поворката.
Настанот се случил за време на активностите организирани во рамки на таканаречениот „Месец на гордоста“, кога поддржувачи на ЛГБТ заедницата организирале парада низ градот.
Додека колоната се движела по улицата „Павлу Мела“, пред возилото што било дел од поворката застанал православен свештеник. Со Библија закачена околу вратот, тој легнал на патот со намера да го блокира минувањето на камионот што ја предводел парадата.
Според очевидци, свештеникот извикувал „Покајте се“, упатувајќи пораки кон учесниците на настанот.
Неговата постапка накратко го запрела движењето на поворката, по што интервенирала грчката полиција и го отстранила од коловозот.
Инцидентот бил снимен од случаен минувач, а видеото брзо се проширило на социјалните мрежи, каде предизвикало бројни реакции и коментари.
