Одделот за внатрешна контрола, криминалистички истраги и професионални стандарди при Министерството за внатрешни работи поднесе кривична пријава против полицискиот службеник З.Р. од Полициската станица за граничен надзор Чашка, поради сомнение дека сторил кривично дело „предизвикување општа опасност“.
Според МВР, инцидентот се случил на 22 мај годинава, кога пријавениот, за време на семејна прослава во дворот на својата куќа и во присуство на поголем број гости, испукал повеќе истрели од огнено оружје, со што ги загрозил животот и безбедноста на присутните.
Кривичната пријава е поднесена до Основното јавно обвинителство за гонење организиран криминал и корупција – специјализирано одделение за кривични дела сторени од лица со полициски овластувања и припадници на затворската полиција.
Од МВР информираат дека против полицискиот службеник ќе биде поведена и дисциплинска постапка за утврдување одговорност поради кршење на работниот ред и дисциплина. Воедно, ќе биде донесена мерка за негово отстранување од работното место, односно суспензија, сè до завршување на дисциплинската постапка.
