Силно невреме во саботата вечерта го погоди грчкиот остров Скијатос, при што за само околу половина час дел од улиците се претворија во поројни водотеци.
Невремето започнало околу 19 часот, а најпогодени биле централните делови и крајбрежјето. Огромни количества вода се слевале по улиците кон морето, носејќи со себе маси, столови и друга опрема од угостителските објекти.
Водата навлегла и во повеќе локали, особено во оние што се наоѓаат на пониски места, при што била оштетена дел од опремата.
Интензитетот на врнежите бил исклучително голем. Во текот на денот биле измерени 67,2 милиметри дожд, додека околу 19:20 часот интензитетот достигнал 281 милиметар на час.
Иако најсилниот дожд траел околу 30 минути, последиците биле видливи на повеќе места. Во одредени делови улиците биле целосно поплавени, а на крајбрежјето водата создала впечаток дека улиците и морето се споиле.
По невремето, сопствениците и вработените во локалите започнале со расчистување и проценка на штетите. На дел од островот имало и прекин во снабдувањето со електрична енергија, а вода навлегла и во просторија на локалното стручно училиште.
Проблеми имало и во сообраќајот, а поради лошите временски услови биле откажани и одредени летови. За време на најсилните врнежи, на некои улици движењето било практично невозможно.
И покрај интензитетот на невремето, според досегашните информации, нема пријавено други поголеми последици.
Скијатос е еден од познатите грчки туристички острови и дел од архипелагот Споради. Иако главната туристичка сезона е при крај, на островот сè уште престојуваат голем број туристи.
Локалните жители и сопствениците на угостителските објекти неделното утро го започнале со расчистување на последиците од невремето кое за само триесетина минути предизвикало сериозни проблеми на повеќе локации.
