Обилните врнежи предизвикани од тајфунот Нара предизвикаа сериозни поплави во делови од Кина, поради што околу 54.000 луѓе морале да бидат евакуирани. Од нив, околу 8.000 биле сместени во привремени засолништа за итни случаи.
Најтешко е погоден регионот Гуангси, каде што поројните дождови предизвикале излевање на водите и поплавување на повеќе населени места. Кинеските метеоролози предупредуваат дека во наредните денови се очекуваат нови врнежи.
Нивото на водата во 15 реки го надминало прагот за издавање предупредување, а на снимките објавени од кинеските медиуми се гледаат целосно поплавени улици и патишта.
Спасувачките екипи се движат низ вода до колена, а на места користат гумени чамци за да ги извлечат жителите од поплавените подрачја.
Во меѓувреме, лошото време влијаело и врз кинеската вселенска програма. Кина го одложи планираното лансирање на амбициозната лунарна мисија „Чанге-7“, која требаше да спроведе истражувања на Месечината, вклучително и потрага по вода во форма на мраз.
Леталото требаше да биде лансирано во наредните денови од космодромот Венчанг на островот Хајнан. Кинеската вселенска агенција соопшти дека мисијата не ги исполнува условите за лансирање во предвидениот период.
Одлуката, како што е наведено, била донесена по сеопфатна процена, со цел да се обезбедат сигурноста и успешното реализирање на мисијата.
