Голем пожар избувна утрово во Еколошкиот парк Дервени во Солун, по што грчките власти мобилизираа бројни противпожарни екипи и воздушни сили за негово локализирање.
Според грчките медиуми, на терен интервенираат 78 пожарникари со 22 противпожарни возила, а во гаснењето се вклучени и нивни колеги од Молдавија, како и доброволци.
Од воздух во гаснењето учествуваат пет авиони и два хеликоптера, кои се обидуваат да ја стават огнената стихија под контрола.
Властите упатија апел до жителите во околните населби да бидат во состојба на готовност и превентивно да ги затворат вратите и прозорците. Во меѓувреме, активирана е и специјална единица за истрага на пожари од Солун, која ќе ги утврдува причините за избувнувањето на пожарот.
Според досегашните информации, огнот засега не претставува закана за станбените населби, но подрачјето е означено како зона со висок ризик од пожари.
