Пожар утринава избувна во логистичкиот центар на компанијата Wildberries во местото Хрјастово, во руската Владимирска област, а руски канали на Телеграм тврдат дека причината е напад со украински беспилотни летала.
На фотографии и видеоснимки објавени од локални жители се гледа густ црн чад што се издига над објектот, додека непосредно пред избувнувањето на пожарот, според нивните тврдења, во областа биле забележани дронови.
Од компанијата Wildberries потврдија дека избувнал пожар, додавајќи дека според првичните информации нема повредени. Украинските власти засега не се огласиле за инцидентот, а обемот на причинетата штета сè уште не е познат.
Ова е втор инцидент поврзан со компанијата за само два дена. Претходно, на 2 август, беше погоден магацин на Wildberries во Самарската област.
Wildberries е една од најголемите компании за интернет-трговија во Русија, а преку својата платформа нуди и воена опрема, меѓу која компоненти за дронови и панцири. Европската Унија во јули воведе санкции кон банкарскиот огранок на компанијата, наведувајќи дека има улога во финансирањето на рускиот државен буџет.
Компанијата и нејзината основачка, Татјана Ким, се под меѓународни санкции и трговски ограничувања од почетокот на руската инвазија врз Украина. Полска, при воведувањето на санкциите во 2022 година, ја наведе Wildberries како еден од најголемите даночни обврзници во Руската Федерација.
Татјана Ким неодамна изјави дека украинските напади врз складиштата на компанијата претставуваат „виша сила“ и дека, според руското законодавство, компанијата нема законска обврска да ги обесштети корисниците чија стока била уништена во такви напади.
