Две лица загинаа, а повеќе од 500 жители беа евакуирани по морски пат откако во неделата речиси истовремено избувнаа два пожари на грчкиот остров Саламина, западно од Атина.
Првиот пожар избувнал околу 14:40 часот по локално време во Перистерија, во јужниот дел на островот, каде што станбените објекти се наоѓаат во близина на шумски предели. Само дваесетина минути подоцна избувнал и втор пожар во источниот дел на островот, во градот Селинија.
Пожарникарите што пристигнале на местото на првиот пожар пронашле две безживотни тела. Засега не е утврдено што ги предизвикало двата пожари.
Во гаснењето биле ангажирани околу 200 пожарникари, 50 противпожарни возила, авиони и пет патролни чамци, а во евакуацијата по море помогнале и приватни пловила.
Грчкиот министер за здравство Адонис Георгиадис соопшти дека најмалку 10 лица биле згрижени поради изгореници или вдишување чад, од кои пет добиле медицинска помош на самиот остров.
Приоритет на пожарникарите е да спречат двата пожари да се спојат преку централниот планински предел на островот, што би создало многу поопасна ситуација.
Саламина има околу 37.000 жители, а властите особено се загрижени поради големиот број постари жители, што ја отежнува брзата евакуација.
