(Видео) Позната состојбата на повредените во автобуската несреќа во Хрватска

Две лица загинаа, а 33 се повредени во тешката сообраќајна несреќа во Хрватска, во која автобус со српски регистарски ознаки се преврте на автопатот А3, на околу 40 километри од Загреб.

Од Клиничкиот болнички центар Загреб соопштија дека веднаш по добиената дојава го активирале внатрешниот протокол за прием и згрижување на поголем број повредени. Биле алармирани сите надлежни болнички служби и преземени потребните организациски и кадровски мерки.

— реклама —

Според последните информации, во автобусот имало вкупно 35 лица, од кои двајца загинале, шестмина се здобиле со тешки телесни повреди, а 27 поминале со полесни повреди.

Повредените се распоредени во пет здравствени установи во Загреб: Клиничкиот болнички центар Загреб, болницата „Сестри на милосрдието“, болницата „Дубрава“, Клиниката за трауматологија и болницата „Меркур“.

— реклама —

Несреќата се случила утрово околу 7:25 часот на автопатот А3, во правец кон Загреб, непосредно по клучката Иванич-Град. Според информациите од теренот, станува збор за автобус на српската компанија „Ниш експрес“.

Автобусот ја пробил заштитната ограда покрај лентата за запирање, по што се превртел на околу десет метри од автопатот.

— реклама —

Во спасувачката акција учествувале противпожарни екипи, брза помош и хеликоптер. Во автобусот имало 33 патници и двајца возачи, а повредените биле пренесени во загрепските болници.

Од Клиничкиот болнички центар Загреб информираат дека пациентите кои досега пристигнале се наоѓаат на дијагностички прегледи и медицинско згрижување.

— реклама —