(Видео) Пронајден скопјанецот кој возеше по велосипедска патека во Бутел - полицијата го казни

Возач од Скопје е санкциониран откако со патничко возило се движел по велосипедска патека во скопската населба Бутел, информира Министерството за внатрешни работи.

— реклама —

Случајот бил откриен откако на социјалната мрежа TikTok било објавено видео на кое се гледа како автомобил „сузуки“ со скопски регистарски ознаки се движи по велосипедската патека покрај улицата „Бутелска“, во правец од кружниот тек кон крстосницата со булеварот „Босна и Херцеговина“.

По објавата, Одделението за безбедност на патниот сообраќај при СВР Скопје веднаш презело мерки за утврдување на идентитетот на возачот.

— реклама —

Од МВР информираат дека возачот е идентификуван како Н.К. (46) од Скопје. Тој на 28 октомври 2026 година бил повикан на службен разговор, по што бил соодветно санкциониран за сообраќајниот прекршок – управување возило по несоодветна сообраќајна површина.

— реклама —

Од Министерството за внатрешни работи упатуваат апел до сите учесници во сообраќајот да ги почитуваат сообраќајните правила и прописи и со своето однесување да не ја загрозуваат безбедноста на останатите учесници во сообраќајот.