Бројот на загинати во разорните земјотреси што ја погодија Венецуела се искачи на 589, додека бројот на повредени достигна 2.980, соопшти вршителката на должноста претседател на земјата, Делси Родригез.
Таа информацијата ја соопшти за време на приемот на спасувачките тимови што пристигнаа од различни делови на светот за да помогнат во справувањето со последиците од катастрофата.
„Ќе ги спасиме луѓето што се заробени. Неуморно работиме на таа задача“, изјави Родригез, пренесува АП.
Најтешко погодена е државата Ла Гваира, која во ноќта меѓу средата и четвртокот беше погодена од два силни земјотреси со јачина од 7,2 и 7,5 степени според Рихтеровата скала.
Во погодените подрачја е засилено присуството на војската, додека спасувачките екипи продолжуваат со потрагата по преживеани и дистрибуцијата на храна и вода.
Се очекува бројот на жртвите дополнително да расте, бидејќи илјадници лица сè уште се водат како исчезнати. Според проценките на Меѓународната организација за миграции, земјотресите би можеле да погодат до 6,76 милиони луѓе во Венецуела, вклучувајќи околу два милиони жители на Каракас.
Во меѓувреме, стотици жители на Каракас ноќта ја поминале во паркови, на паркинзи и на други отворени простори, стравувајќи да се вратат во своите домови.
Родригез ја посети и најпогодената област, каде што одржала состанок со локалните власти за проценка на состојбата и координација на понатамошните активности. Според претседателството, веќе е наредена мобилизација на тешка механизација и итна испорака на вода, храна, душеци и ќебиња за погоденото население.
