(Видео) Разорни поплави во Кина: Возила носени од вода и урнати мостови, загинаа најмалку десет лица

Силните дождови што ја погодија јужна и централна Кина предизвикаа големи поплави во кои загинаа најмалку десет лица, додека во повеќе провинции беа затворени училишта и компании, а нарушени се сообраќајот и снабдувањето со електрична енергија.

Според кинеските медиуми, најмалку шест лица загинале откако пикап-возило со 15 патници било однесено во надојдена река во југозападниот регион Гуангси.

— реклама —

Во одделни инциденти, три лица загинале во поројни поплави во село во провинцијата Хубеи, додека уште едно лице го загубило животот во јужната провинција Хунан.

Кинеската метеоролошка агенција предупреди дека областите во Џјангси, Анхуеј, Хунан, Хубеи, Гуиџоу, Гуангси, Гуангдунг и Хаинан се соочуваат со висок ризик од поројни поплави и свлечишта.

— реклама —

Во делови од централните провинции Хубеи и Хунан е во тек евакуација на населението од поплавените подрачја.

Во градот Џингџоу бил урнат историски рекорд по количината врнежи, откако метеоролошката станица започнала со работа во 1953 година.

— реклама —

Противпожарно-спасувачките служби на Хубеи испратиле повеќе од 1.410 пожарникари, над 90 спасувачки возила, повеќе од 1.500 парчиња опрема и залихи, како и 100 чамци во Џингџоу, соопштија локалните власти, пренесува „Чајна дејли“.

Во погодените подрачја е запрен јавниот превоз, вклучително и градските автобуси, такси-превозот и меѓуградскиот транспорт.

Властите ги повикаа жителите да избегнуваат непотребни патувања.