(Видео) Речиси 1.000 уапсени во Франција, Париз и натаму во судири – демонстрантите не се повлекуваат

Речиси 1.000 лица се уапсени за време на масовните протести низ Франција, соопшти францускиот министер за внатрешни работи Лоран Нуњез, додека во Париз продолжуваат судирите меѓу демонстрантите и полицијата и по завршувањето на главниот протестен марш.

Нуњез во изјава за француските медиуми потврди дека бројот на приведени лица се приближува до илјада, предупредувајќи дека се очекува дополнително да се зголеми. Неговата изјава ја пренесе француската телевизија БФМ ТВ.

— реклама —

Во Париз, и повеќе од еден час по избувнувањето на судирите, околу илјада демонстранти останале на улиците и покрај полициските интервенции, јавува Си-ен-ен.

Претходно, десетици илјади граѓани учествувале во мирен протестен марш, кој завршил без поголеми инциденти. Меѓутоа, по неговото завршување, дел од демонстрантите останале на местото на собирот, каде што започнале судири со полициските сили.

— реклама —

Според известувањата од теренот, меѓу преостанатите демонстранти преовладуваат млади луѓе, од кои многумина се облечени во црна облека.

Полицијата распоредила сили долж крстосниците и пристапните улици, обидувајќи се да ги потисне собраните граѓани. Дел од демонстрантите палеле факели, додека во околината се слушале силни детонации од полициските шок-бомби.

— реклама —

Во близина на Порт де Венсен дошло до нови тензии, откако дел од демонстрантите се обиделе да постават барикада, по што интервенирале полициските сили.

Иако полицијата успеала да ги потисне демонстрантите од одредени делови на крстосницата, не успеала целосно да ги растера. Околу илјада лица продолжиле да се задржуваат на улиците, без знаци дека наскоро ќе се повлечат.

Претходно француските власти потврдија дека за време на протестите две лица се тешко повредени, едното во Клермон-Феран, а другото во Тулуз.

Масовните демонстрации се одржуваат во повеќе градови низ Франција, а градоначалникот на Сен Дени, Бали Багајоко, претходно изјави дека во протестите учествувале повеќе од 800.000 луѓе. Оваа бројка е негова процена и не претставува официјално потврден податок за вкупната излезност.

Француските безбедносни служби продолжуваат со интервенциите, додека надлежните предупредуваат дека бројот на уапсени може дополнително да се зголеми