(Видео) Рекордни дождови ја парализираа Јапонија: Четири лица загинаа, 7.000 патници заглавени на аеродром

Рекордни врнежи ја зафатија Јапонија, предизвикувајќи поплави, прекини во сообраќајот и сериозни проблеми со електроснабдувањето. Најмалку четири лица го загубија животот, а едно лице се води како исчезнато.

Во делови од префектурата Чиба, која се наоѓа во близина на Токио, за само 24 часа наврнале повеќе од 360 милиметри дожд. Водата поплавила патишта и железнички линии во период кога земјата е во еден од најфреквентните празнични периоди.

— реклама —

Меѓу загинатите е и лице кое останало заробено во поплавено возило. Поради сериозноста на ситуацијата, јапонските власти ја вклучиле и армијата во спасувачките и санациските активности.

Невремето предизвикало проблеми и со снабдувањето со електрична енергија. Според податоците на Tokyo Electric Power, во петокот наутро повеќе од 22.000 домаќинства биле без струја. Во градот Чиба, едно од најпогодените подрачја, стотици луѓе ја поминале ноќта во привремени центри за евакуација.

— реклама —

Особено тешка била состојбата на меѓународниот аеродром Нарита. Поради прекините во транспортните врски, околу 7.000 патници останале во терминалите. Иако се очекувало летовите да продолжат според распоредот, авиокомпаниите предупредиле на можни доцнења.

— реклама —

Снимките на јапонската јавна телевизија NHK покажале стотици патници како спијат на подовите на терминалите, покриени со ќебиња и снабдени со вода и храна од аеродромскиот персонал.

Поплавите довеле и до затворање на повеќе главни автопати во Чиба, поради што на алтернативните правци се создале големи колони. Дел од железничкиот сообраќај сè уште бил во прекин, иако повторно биле воспоставени некои линии меѓу Нарита и Токио.

„Ова е целосно невообичаена ситуација. Учествував во санирање на многу катастрофи, но никогаш не сум доживеал нешто слично“, изјавил гувернерот на Чиба, Тошихито Кумагаи.