Кристијано Роналдо најави дека претстојната сезона би можела да биде последна во неговата професионална фудбалска кариера, со што би ставил крај на патот што трае веќе 25 години.
41-годишниот Португалец во разговор за „Вог“ откри дека сериозно размислува за повлекување од фудбалот.
„Ова веројатно ќе биде мојата последна година во фудбалот и сакам да оставам спектакуларно наследство“, изјави Роналдо.
Тој има договор со Ал Наср до јули 2027 година, кога ќе наполни 42 години, па токму истекот на актуелниот договор би можел да означи крај на неговата професионална кариера.
До тогаш Роналдо ќе има можност да ја достигне и неверојатната граница од 1.000 голови. Во моментов му недостигаат уште 30 погодоци за ова достигнување.
Португалецот веќе размислува и за животот по фудбалот. Тој сака повеќе да патува, но и поголем дел од слободното време да посвети на паделот, спорт што особено го сака.
„Фудбалот може да остави голема празнина, па мора да ја исполните со повеќе работи, а не само со една“, вели Роналдо.
По две и пол децении професионален фудбал, тој сака да поминува повеќе време со семејството и да ужива во она што го стекнал во текот на кариерата.
Ал Наср новата сезона ја започна со победа од 3:0, но Роналдо не настапи. Тој пристигнал во Саудиска Арабија неколку дена претходно, а натпреварот го следел од трибините во друштво на сопругата Георгина Родригез и нивните деца.
Доколку навистина се повлече по истекот на договорот со Ал Наср, Роналдо ќе има уште една сезона да се обиде да ја заокружи кариерата со достигнување кое досега не го остварил ниту еден фудбалер – 1.000 постигнати голови.
