(Видео) Русија го нападнала Киев со балистички ракети и дронови, загинал еден човек, над 20 се повредени

Руски сили извршиле масовен напад врз Украина во ноќта на 22 октомври, при што главна цел бил Киев. Според украинските власти, во нападот биле употребени балистички ракети и 210 беспилотни летала, а една личност загинала и повеќе од 20 биле повредени.

Украинските медиуми објавија дека руските сили го нападнале историскиот центар на Киев со балистичка ракета „Искандер“, опремена со касетна боена глава К5. Информацијата ја потврдил Серхиј Бескрестнов, советник на украинскиот претседател за технолошки прашања, познат како „Флеш“.

— реклама —

Според него, боевата глава експлодира во воздух и е наменета за нанесување штета врз луѓе и опрема на површина од околу 400 на 400 метри. Тој тврди дека истовремено во воздухот експлодираат 58 подбоеви глави.

„Овој напад не бил извршен со воена цел. Целта била да се уништи дел од стариот град и да се повредат што повеќе луѓе. Имаме многу повредени цивили и големи разурнувања“, изјавил Бескрестнов.

— реклама —

Во ноќното гранатирање бил оштетен и Введенскиот манастир на Украинската православна црква. Според Сојузот на православни новинари, делови од покривот биле откорнати од шрапнели, а двајца парохијани биле повредени.

— реклама —

Украинскиот претседател Володимир Зеленски соопшти дека Русија во текот на ноќта испукала 21 ракета кон Киев. Тој посочи дека нападот се случил непосредно по разговорите меѓу претставници на САД и Русија, оценувајќи дека тоа покажува оти нема вистинска промена во ставот на Москва кон мировните иницијативи.

Според украинските информации, руските сили употребиле балистички ракети и 210 беспилотни летала, од кои украинската противвоздушна одбрана неутрализирала 181. Покрај Киев, последици од нападите биле пријавени и во Кременчук, Харков, Одеса, Виничката и Волинската област, како и во други региони.

Во Киев биле пријавени оштетувања на трговскиот центар „Епицентар“ во областа Почајна и на Јужниот мост, кој бил затворен за сообраќај во правец на левиот брег.