(Видео) Русија лансираше ракета способна да носи нуклеарно оружје, прелета 5.400 километри

Русија тестираше интерконтинентална балистичка ракета „Булава“, способна да носи нуклеарни боеви глави, која прелетала околу 5.400 километри низ руската територија пред да погоди цел на полигонот Чижа, во Архангелската област, недалеку од границите на Норвешка и Финска.

Лансирањето било извршено од нуклеарната подморница „Генералисимус Суворов“ во Охотското Море, на рускиот Далечен Исток. Руското Министерство за одбрана соопшти дека боевите глави пристигнале до зададената цел во предвиденото време, претставувајќи ја операцијата како дел од редовната воена обука.

— реклама —

Полигонот Чижа се наоѓа на околу 517 километри од норвешкиот град Вардо и 610 километри од финското место Нуоргам. Ова е третпат од 2020 година интерконтинентална ракета да биде лансирана од Охотското Море кон овој полигон.

Тестирањето се случило неколку часа по телефонскиот разговор меѓу рускиот претседател Владимир Путин и лидерите на Финска и Норвешка, Александер Стуб и Јонас Гар Стере. Во разговорот, кој траел околу 90 минути, двајцата европски лидери го повикале Путин да преземе чекори за намалување на судирите во Украина.

— реклама —

Стуб изјави дека исходот од војната директно ќе влијае врз безбедноста на Финска, Норвешка и Европа, додека Стере предупреди на огромните човечки и материјални последици од конфликтот.

— реклама —

Според Кремљ, Путин порачал дека секое трајно решение мора целосно да ги земе предвид руските интереси, обвинувајќи ги ЕУ и НАТО дека со својата политика придонесуваат за продолжување на војната. Извор близок до Кремљ за „Ројтерс“ изјавил дека рускиот претседател повторил оти Москва нема да се откаже од целта да воспостави контрола врз целиот украински регион Донбас.

По разговорот со Путин, Стуб и Стере разговарале и со украинскиот претседател Володимир Зеленски, кој повика на конкретни чекори за намалување на тензиите, вклучително и во областа на енергетиката и инфраструктурата.

Рускиот министер за надворешни работи Сергеј Лавров изјави дека во разговорите немало ништо ново и предупреди дека војната најверојатно ќе ескалира.