Русија почна да распоредува нови противвоздушни системи „Панцир-СМД-Е“ на покриви на цивилни објекти во Москва, покажуваат снимки објавени од воени аналитичари и украинскиот портал „Милитарни“.
На видеоснимка објавена деновиве се гледа како рускиот тежок транспортен хеликоптер „Ми-26“ поставува систем „Панцир-СМД-Е“ на покривот на деловниот центар „Нордстар Тауер“ во северниот дел на Москва.
Станува збор за понова верзија на рускиот систем за противвоздушна одбрана со краток дострел, специјално дизајнирана за борба против дронови и помали воздушни цели. За разлика од постарите верзии, овој модел нема автоматски топови од 30 милиметри.
Системот користи два вида ракети – стандардни ракети со дострел до 20 километри и помали ракети наменети за уништување мали беспилотни летала на оддалеченост до седум километри.
Според украинскиот портал, системот располага и со современ радарски пакет со можност за откривање цели на далечина до 24 километри.
Русија првпат почна да поставува системи „Панцир“ на покриви во Москва уште во 2023 година, откако украински дронови успеаја да стигнат до рускиот главен град. Еден од системите тогаш беше поставен и на зградата на руското Министерство за одбрана.
Во меѓувреме, Москва дополнително ја зајакна противвоздушната одбрана околу градот со мобилни единици и системи префрлени од други региони.
Според проценките на „Милитарни“, само во текот на 2023 година Русија распоредила повеќе од 40 дополнителни системи „Панцир-С1“ околу Москва, а вкупниот број нови системи поставени од 2023 година надминал 100.
Потегот следува по засилените украински напади со далекуметни дронови врз воени, индустриски и енергетски цели во Русија, при што беспилотни летала неколкупати стигнаа и до Москва.
